給有選擇困難症的你

​人生是不停的做決定，小至決定食乜，大至生唔生小朋友都係決定，學識點樣做決定係一生中最重要既課題。

我整理出以下三點提醒自己，不要再選擇困難，希望都幫到你。

第一，了解點解太多選擇唔係好事；第二，一啲實用既心態同方法，不再選擇困難；第三，令你既決定變得更好。

第一，點解太多選擇唔係好事。

從細到大，我地都被教導，選擇都係愈多愈好。有得擇，先至係老闆。有選擇代表我地自由，代表我地可以為自己負責，代表我地為自己既命運有話語權。

一個心理學家同大學教授，Barry Schwartz 就用一本書，The Paradox of Choices 去挑戰選擇愈多愈好哩個講法，係Ted Talk 上面都累積左6.1個Million 既views，有興趣可以睇下。

哩個挑戰由果醬開始，係2000年，兩個心理學家 Sheena Iyengar and Mark Lepper 發表左一份相當有趣既研究。係一間高級超市入面，放左兩個試食攤檔，其中一個係大攤檔，有24款果醬既；另一個細好多，得6款。你估下邊個攤檔賣得多啲? 大攤擋成功吸引較多既人潮，但係比起細攤檔，則只有1/10 人購買。

點解會咁架呢？

每個選擇背後，同時都代表我地放棄左一野。一個決定，點為之好，就係同另一個決定去作比較，哩個就係所謂基會成本。當我地選擇左士多啤利果醬，就會諗藍莓味果醬更好，搞到我地食士多啤利果醬既時候，腦海入面一路諗冇買到既藍莓味果醬有幾咁好味，我地失去左幾多，反而冇好好欣賞我地食緊既士多啤利果醬。

所以，當你有愈多選擇，反而導致3個結果：

1） 做每個決定需要更多既付出；

2） 更加容易出錯；

3） 承受更大既壓力

買果醬事小，但當我地面對更重要既決定時，好似工作、移民、組織家庭，我地就要小心，唔好跌落以為選擇愈多愈好既陷阱。

接住，希望比你3個方法，令你更容易做出選擇。

第一： 只做重要既選擇。

當你見到24 樽果醬既時候，冇人逼你買。同樣，去到餐廳，面對琳𤨡滿目既選擇，你可以一係叫最肥個人既餐，因為最好食；一係最健康個人既餐，因為最健康，甚至眯埋眼選一個都可以。唔好將你珍貴既集中力、精神、時間放係唔重要既決定道，留返心力去做重要既決定。

第二： 相信你既直覺

係另一個實驗，實驗人員送海報比學生，海報入面有名畫、可愛動物、MEME 圖、電影海報等等。

一組學生，被要求選擇時講出原因；另一組則唔洗。

實驗人員過幾個月再問兩組學生重有冇留低海報。

奇怪既係，被要求講出原因既學生留低海報既反而更少。

有時，我地既直覺，雖然唔可以用文字表達出黎，但可能黎得更為深刻。有啲選擇，超越文字、邏輯。

好幾個對我人生相當重要既決定，花長時間整張pros and cons 清單，思前想後，根本冇用，最終用直覺做決定，而之後亦冇感到後悔。

下次，當一個決定超愈左你張pros and cons 清單，勇敢 相信你既直覺做出決定啦！

第三： 做一個滿足者，而唔係完美者。

一個完美者，一定要搵到最完美既餐廳，野食要最多人按讚，價錢重要最抵。

滿足者，就係唔追求完美，追求意足。滿足者唔代表就冇要求，佢同樣可以為自己設置好高既標準。以揀餐廳為例，你可以要求間餐廰有冷氣，西餐，甚至要求Google 評分1000人食過，有4分，每人唔超過HK$500 。當有一間餐廳符合哩個要求，滿足者就會欣然停止選擇，去食哩間符合佢條件既餐廳。

對比完美者同滿足者，最後，完美者搵到既餐廳可能真係好啲、抵啲，但更有可能既係，完美者一路搵，一路搵，搵到胃口都冇埋，根本連餐飯都冇食。

當佢真係搵到，但搵到哩間餐廰背後需要付出既努力，真係值得嗎？

有研究顯示，滿足者比完美者更開心，係社會上既成就亦都更高。背後原因都好明顯，完美係唔存在的，完美者一路搵，唔願意做出選擇，滿足者唔係最求一個可能唔全在既完美，只需要透過每足自己設定合理既要求就會覺得開心，亦更樂意採取行動，自然比完美者更成功。

最後既一個希望帶比大家既信息係：人未必可以做最好既選擇，但可以令決定變得最好。

生命非常複雜，一個決定單獨既影響，往往比你想像中細。但矛盾地，一個個決定加埋，就做就今日既你，一啲你好珍惜既人同事，都係由過去一啲你覺得唔好，甚至係錯既決定而黎。

你要做既，就係專注當下要做既事，要做既決定，令明日既你變得更好。

米蘭‧昆德拉係佢既作品，生命中不能承受的輕講過：生命係冇草稿既，每一筆都有影響，生命最終只有我地係畫冊上刻劃既輪廓。調返轉諗，冇人知最終結果，反而令我地更放心，唔洗驚做錯決定，放膽落筆，勇敢畫出你亂糟糟，但漂亮既人生啦。

總結一下，由今日起，第一，唔好再曬時間係唔重要既決定上面；第二，多啲相信你既直覺；第三，做一個滿足者，而唔係一個完美者；最後，唔好追求最好既決定，而係要令你既決定變得最好。

今日，我地就做左一個非常重要既決定，我地要收養第二隻小狗啦！

我地上星期做中途家庭，中途家庭意思就係為未有人收養既小狗提供住宿，並照顧佢既日常生活，10日之後，小狗愈黎愈痴人，內心都愈黎愈不捨，將小狗還比志工之前，開始思考係咪要將小狗留低。

諗既過程中，有無數既擔心，比如要出國時邊個幫手睇兩隻小狗？我地有冇時間照顧多一隻狗？準備食物，玩既時間？架車夠唔夠大放兩隻狗？搬去加拿大之後既住所又可唔可以收容兩隻狗？

但志工黎到前30 分鐘，我同太太兩人兩狗一齊係Disney + 睇獅子王Mufasa (順帶一提，好多人話套電影好爛，我覺得幾好睇。)兩隻小狗好似好好朋友咁挨埋一齊，小狗眼神好似有種淡淡既哀傷，仿似知道分離在即。

當刻，我選擇相信我既直覺，跟志工講，我們希望把小狗留下，讓她成為我們家庭的一份子。（當然，小狗眼神既哀傷好有可能係我自己想像出黎，投射落小狗道，不過，話說回來，人既世界，有咩唔係想像出黎？）

我相信我地有能力，比兩隻小狗幸福既過完佢地10幾年既狗生，人同狗都係因為哩個決定，生活更豐富同快樂。可以預見各樣大大小小既問題，多養一隻小黑狗可能未必明智，甚至唔係一個最好既決定，但我地會令哩個決定變得最好。多年後回顧，只會感恩我地既選擇，我真心相信會係咁樣。

多謝你既時間，期待你次再同大家分享。